پاکستان کرکټ ولې له بحرانه نه وځي؟

اسلام اباد—د انګلستان خلاف د ټېسټ لوبو له دوو درنو ماتو وروسته د پاکستان کرکټ یو ځل بیا له تازه کړکېچ سره مخ شوی او په لوبډله کې د مهمو بدلونونو وروسته پخواني کپتان او د لوبغاړو خوښونکی (سلیکټر) مصباح الحق هم په احتجاج کې استعفا ورکړې ده.

پاکستان د انګلستان نه د دریو ټېسټ لوبو په سیریز کې د دوه پرله‌ پسې ماتې وروسته د ګل په ورځ په لوبډله کې لوی بدلونونه اعلان کړل.

د ټېسټ لوبډلې سر روزونکی سرفراز احمد، چې یوازې څو میاشتې وړاندې دې دندې ته ټاکل شوی و، له خپلې دندې لرې کړل شو او پر ځای یې د سپین بال لوبډلې روزونکی مایک هېسن وټاکل شو او د بالینګ د روزونکي عمر ګل پر ځای اسټرالوي ایشلي نوفکې مقرر شو.

د پاکستان کرکټ بورډ (پي-سي-بي) د برمنګهم د وروستۍ ټېسټ لوبې نه وړاندې اووه لوبغاړي هم کور ته ولېږل، چې پکې تجربه لرونکي لوبغاړي محمد رضوان، سلمان علي اغا او امام الحق هم شامل دي. 

د لوبډلې لپاره پنځه داسې لوبغاړي اخیستل شوي چې تر اوسه یې د پاکستان لپاره ټېسټ لوبه نه ده کړې. له دې سره امکان شته چې د سپټمبر په ۹مه د درېیمې ټېسټ لوبې په پیل کې څو لوبغاړي خپله لومړۍ ټېسټ لوبه وکړي.

پخوانی کپتان او د کرکټ بورډ پخوانی مشر رمیز راجا وايي:

“زه هڅه کوم چې ځان قانع کړم چې هر څه سم دي، خو داسې نه ده. دا یوازې ښيي چې د پاکستان کرکټ د وېرې تڼۍ وهلې ده."

د کرکټ بورډ دغو ناڅاپي پرېکړو د پخوانیو لوبغاړو او روزونکو سخت غبرګونونه هم راپارولي دي. د هغوی په وینا، د کرکټ بورډ د ستونزو د حل پر ځای په لوبډله کې لا زیاته بې باوري پیدا کړې ده.

د پاکستان پخواني روزونکي مکي ارتر دا حالت "بلکل بې عقله پرېکړه" بللی او ویلي یې دي چې د پاکستان کرکټ د مشرتابه، پلان او منظم نظام له کمښت سره مخ دی.

پخواني سلیکټر توصیف احمد بیا دغه بدلونونه "بې ساري او ناعادلانه" بللي او ویلي یې دي چې دې پرېکړو د ملي لوبډلې شاوخوا لا خراب ماحول جوړ کړی دی.

پخوانیو کپتانانو شاهد اپریدي او شعیب ملک هم د دغو پرېکړو پر وخت نیوکه کړې ده. 

اپریدي ویلي چې له تجربه لرونکو لوبغاړو سره باید داسې چلند ونه شي، په داسې حال کې چې شعیب ملک ټینګار کړی چې د لوبغاړو د کارکردګۍ حساب باید د سیریز یا دورې له ختمېدو وروسته واخیستل شي، نه د دورې په منځ کې.

پخوانی آل راونډر شاهد اپریدي وايي:

“حتی د هغو لوبغاړو انتخاب هم سم نه ښکاري؛ په انګلستان کې د ټېسټ لوبې لپاره ټي ټوینټي لوبغاړي راوستل شوي دي. دا څه ډول فکر او تګلاره ده؟ ولې کوچ له پنځو ټېسټ لوبو وروسته لرې کړل شو؟ دا د سلیکشن کمېټې تر ټولو حیرانوونکې پرېکړه ده."

د پاکستان د لوبډلې کمزورې کارکردګۍ هم دا بحران نور زیات کړی دی. پاکستان په هیډینګلي کې د اننګز او ۱۰۳ منډو په توپیر ماتې وخوړه او بیا یې په لارډز کې د ۱۹۴ منډو په توپیر دوهمه ټېسټ لوبه وبایلله.

په دغو دواړو ټېسټ لوبو کې د پاکستان هېڅ یوه پاڼۍ هم ۲۰۰ منډو ته ونه رسېده، چې د بیټینګ ترڅنګ یې د بالینګ او فیلډنګ په اړه هم جدي پوښتنې راپورته کړې دي.

د انګلستان خلاف دغو ماتو د پاکستان د بهرنیو ټېسټ لوبو کمزوری ریکارډ هم نور خراب کړی دی. پاکستان اوس له خپلو وروستیو ۱۱ بهرنیو ټېسټ لوبو څخه ۱۰ بایللې دي او د نړیوال ټېسټ چمپین شپ په جدول کې په وروستي مقام کې دی.

پاکستان کې د کرکټ له مینه والو سره د ګډوډۍ او ناڅاپي بدلونونو خبره نوې نه ده. خو اوس داسې ښکاري چې دا ګډوډي د لوبډلې لپاره له یوه عادي حالت څخه په لویه ستونزه بدله شوې ده.

ځکه د لوبغاړو له کمزورې کارکردګۍ مخکې د کرکټ د ادارې ګډوډي د لوبډلې پر ذهنیت او باور اغېز کوي، او د پاکستان کرکټ له داسې یوې کړۍ سره مخ دی چې هره ماتې نوې پرېکړه، او هره نوې پرېکړه بیا نوې بې باوري پیدا کوي.