ډي آي خان:په چیک پوسټ ځانمرګی برید، کې 11 کسان وژل شوي، 30 ژوبل

پېښور—د خېبر پښتونخوا د ناکراره سيمې ډي آی خان په درازنده کې د امن مېلې په چیک پوسټ باندې د بارودو د ډک موټر په وسیله ځانمرګی برید شوی چې له امله یې لږ تر لږه 11 کسان وژل شوي او 30 نور ژوبل شوي دي.

د ریسکیو 1122 چارواکي وايي، په وژل شویو کې 8 نارینه، 2 ښځې او یو ماشوم شامل دي. دا لا معلومه نه ده چې په دغه برید کې پولیسو ته څومره ځاني تاوان اوښتی دی.

د خېبر پښتونخوا د پوليسو وياند د ځانمرګي بريد پخلی کړی او پخپل بيان کې يې ويلي لمري معلومات ښيي چې يوولس کسان وژل شوي او 30 ژوبل روغتون ته رسول شوي.

د لومړنیو معلوماتو له مخې، بریدګر د بارودو ډک موټر د پولیسو، کسټم او نورو امنیتي ادارو له ګډ چیک پوسټ سره وجنګاوه او وروسته زوروره چاودنه وشوه.

سرچينې وايي د پېښې له امله چیک پوسټ او شاوخوا ودانیو ته دروند زیان اوښتی او د ژغورنې ډلې د خاورو او ملبې لاندې د قربانیانو د مړو او ژوبلو کسانو د ایستلو لپاره عملیات کوي.

پولیس وايي، د پېښې ځای ته د بمونو شنډولو ډلې هم رسېدلې دي، څو د چاودنې څرنګوالی او د کارول شویو چاودېدونکو موادو په اړه معلومات راټول کړي. 

د برید مسؤلیت تر دې دمه کومې وسله والې ډلې نه دی منلی.

د درازندې دا سیمه کې له دې وړاندې هم يو شمير وسله وال بریدونه شوي دي.

 د 2024 کال د اکتوبر پر 25مه د درازندې پر زام ایف سي چیک پوسټ وسله وال برید کې د د ايف سي 10سرتېري وژل شوي او 3 نور ژوبل شوي وو

د چیک پوسټونو پر ضد د بارودو ډکو موټرو کارول هم په سیمه کې نوې خبره نه ده.

 د2026 کال په فبرورۍ کې په باجوړ کې پر ګډ چیک پوسټ د برید پر مهال د پاکستان پوځ ویلي وو چې وسله والو د امنیتي ځواکونو له ځوابي ډزو وروسته د بارودو ډک موټر د چیک پوسټ له دېوال سره جنګولی و، چې په نتیجه کې یې 11 امنیتي کسان او یوه ماشومه نجلۍ وژل شوي وو.

د درازندې له ننني برید څو ورځې وړاندې،د سپټمبر پر 18مه په کوهاټ کې د پولیسو د زاړه مرکز ترڅنګ پر جومات هم ځانمرګي بريد شوی و. 

د پولیسو او نورو چارواکو په وینا، په هغه برید کې بریدګر د بارودو ډک موټر د پولیسو مرکز ته نږدې ورساوه او له چاودنې وروسته وسله والو له امنیتي ځواکونو سره نښته وکړه. د ډان د وروستي راپور له مخې، د کوهاټ په برید کې د وژل شویو شمېر 23 کسانوته رسېدلی چې 17پکې پولیس او 6 ولسي وګړي پکې شامل دي.

د کوهاټ برید مسؤلیت د اتحاد المجاهدین په نوم هغې ډلې منلی و چې د پاکستاني طالبانود حافظ ګل بهادر ډلې سره تړاو لري، خو د درازندې د ننني برید مسؤلیت لا تر اوسه چا نه دی منلی.

د کوهاټ له برید وروسته په خیبر پښتونخوا کې د امنیتي پېښو او د پولیسو او امنیتي ځواکونو پر پوستو د بریدونو په اړه اندېښنې زیاتې شوې دي.

 د درازندې نننۍ پېښه هم په داسې وخت کې شوې چې په وروستیو میاشتو کې په صوبه کې پر امنیتي پوستو ګڼ بریدونه شوي دي.